Næsta sunnudag, 29. janúar kl. 13, verða undanúrslit í spurningarkeppni fermingarbarna í Kópavogi. Hver þjóðkirkjusöfnuður í Kópavogi sendir eitt lið í keppnina sem fer fram í safnaðarheimili Kópavogskirkju, Borgum. Fermingarbörn og foreldrar eru hvattir til að koma og fylgjast með keppninni.

Úrslitin verða svo helgina á eftir, sunnudaginn 5. febrúar kl. 16-18. Þá verður stór hátíð hjá fermingarbörnum í Kópavogi, haldin verður poppmessa í Digraneskirkju með Regínu Ósk og Svenna, eiginmanni hennar, úrslit í spurningarkeppninni fer fram og einnig risaflóamarkaður allra fermingarbarna í Kópavogi. Með Flóamarkaðnum gefst tækifæri fyrir fermingarbörn og fjölskyldur þeirra að  losa um pláss í geymslum, kössum eða háloftum og bjóða öðrum að kaupa nytja hluti á kostakjörum. Ágóði af flóamarkaðanum mun renna óskiptur til Innanlandsaðstoðar Hjálparstarfs kirkjunnar.

Hlutir sem koma til greina eru bækur, geisla diskar, myndbönd- og mynddiskar, málverk, leikföng, lampar, skrautmunir, eldhúsáhöld, borðbúnaður og svo framvegis. Einnig eru minni húsgögn, raftæki og vel með farinn fatnaður vel þeginn. Það sem ekki selst á Flóamarkaðnum verður gefið áfram á Nytjamarkað Kristniboðssambandsins í Austurveri.

Ætlast er til að öll fermingarbörnin taki þátt og leggi til að minnsta kosti tvo nytjahluti en þeim skal skilað í kirkjuna í vikunni á undan á skrifstofutíma kl. 9:00-16:00 þriðjudaga til fimmtudaga, og föstudaga kl. 11:00-14:00. Munum: Margt smátt gerir eitt stórt og enginn getur hjálpað öllum en allir geta hjálpað einhverjum.

Verið hjartanlega velkomin á spurningarkeppni, flóamarkað og í poppmessu!