Hjallakirkja

Sumarsamstarf þjóðkirkjusafnaðanna í Kópavogi

Sr. Íris Kristjánsdóttir — Mon, 14 May 2012 00:33:40 +0000

Söfnuðir Þjóðkirkjunnar í Kópavogi hafa á undanförnum árum átt gott samstarf um ýmsa þætti kirkjustarfsins, meðal annars helgihald sumarsins. Áframhald verður á því á þessu sumri og er það samstarf þegar hafið.

Sunnudaginn 20. maí verður því ekki guðsþjónusta í Hjallakirkju en helgihald verður í öðrum kirkjum Kópavogs þennan dag. Nánari upplýsingar um helgihald sumarsins í kirkjum Kópavogs er að finna hér.

Á Hvítasunnudag, 27. maí kl. 11, verður sameiginleg guðsþjónusta safnaðanna í Hjalla- og Digraneskirkjum. Sr. Íris Kristjánsdóttir og sr. Gunnar Sigurjónsson þjóna.

Messur verða í Hjallakirkju 3. og 10. júní kl. 11. Sr. Íris Kristjánsdóttir þjónar.

Kynnið ykkur endilega helgihald í kirkjum Kópavogs á þessari heimasíðu.

Uppstigningardagur, dagur aldraðra

Sr. Íris Kristjánsdóttir — Mon, 14 May 2012 00:16:08 +0000

Á Uppstigningardag, fimmtudaginn 17. maí, verður guðsþjónusta í Hjallakirkju kl. 14. Hjalla- og Digranessöfnuðir sameina krafta sína á þessum degi en guðsþjónustan er á vegum beggja safnaða. Sr. Íris Kristjánsdóttir og sr. Magnús B. Björnsson þjóna og sr. Ægir Sigurgeirsson prédikar. Söngvinir, kór aldraðra í Kópavogi, syngja og leiða safnaðarsönginn og organisti er Helga Þórdís Guðmundsdóttir. Að guðsþjónustu lokinni verður boðið upp á veitingar í safnaðarsal. Allir eru hjartanlega velkomnir.

Kynningarfundur um fermingarstörfin 2012-2013

Sr. Íris Kristjánsdóttir — Tue, 08 May 2012 13:26:03 +0000

Miðvikudaginn 9. maí kl. 18 verður haldinn kynningarfundur um fermingarstörf í Hjallakirkju veturinn 2012-2013. Á fundinn eru sérstaklega boðin velkomin væntanleg fermingarbörn fædd 1999 og foreldrar þeirra. Farið verður yfir tilhögun fermingarfræðslunnar á næsta vetri en hún hefst með námskeiði í ágúst fyrir þau fermingarbörn sem það kjósa. Einnig er hægt að hefja fræðsluna í september. Nú þegar er hægt að skrá sig í fræðsluna hér á síðunni, undir Fermingarstarf / Skráning.

Garðhreinsun við Hjallakirkju

Sr. Íris Kristjánsdóttir — Tue, 08 May 2012 10:37:20 +0000

Miðvikudaginn 2. maí voru vorverkin tekin í Hjallakirkju, garðurinn hreinsaður að hluta og gerður fínn fyrir sumarið. Ætlunin er að halda verkinu áfram í næstu viku, miðvikudaginn 9. maí kl. 17-19.30. Öll þau sem áhuga og getu hafa eru velkomin að hjálpa til. Boðið verður upp á pylsur og með því til að seðja hungrið eftir garðyrkjustörfin. Sjáumst hress á garðdeginum!

Hér eru myndir frá garðdeginum 2. maí:

Kveðjumessa 13. maí

Sr. Íris Kristjánsdóttir — Tue, 08 May 2012 10:34:13 +0000

Sunnudaginn 13. maí kl. 11 verður kveðjumessa í Hjallakirkju, í tilefni þess að sr. Íris Kristjánsdóttir mun kveðja Hjallasöfnuð í sumar. Sr. Íris heldur af stað til nýrra prestsstarfa í Kanada en hún hefur verið prestur í Hjallakirkju í tæp 16 ár. Við messuna þjóna báðir prestar kirkjunnar, sr. Íris og sr. Sigfús Kristjánsson. Kór kirkjunnar syngur og Jón Ólafur Sigurðsson leikur á orgelið. Að messu lokinni verður viðstöddum boðið að þiggja léttar veitingar í boði safnaðarins. Allir eru hjartanlega velkomnir.

Þess má geta að sr. Íris mun starfa í Hjallasöfnuði til loka júnímánaðar.

Vorhátíð sunnudagaskólans

Sr. Íris Kristjánsdóttir — Fri, 04 May 2012 11:46:41 +0000

Sunnudaginn 29. apríl var haldin vorhátíð sunnudagaskólans. Bæði börn og fullorðnir nutu sín við söng og leik, jafnt innandyra sem utan. Allir fengu grillaðar pylsur og með því og dagurinn tókst í alla staði mjög vel. Það munar miklu þegar veðrið er gott og hægt er að fara í leiki utandyra. Nú er sunnudagaskólinn kominn í sumarfrí og hefst aftur í byrjun september.

Messa og ferming 6. maí

Sr. Sigfús Kristjánsson — Thu, 03 May 2012 13:41:01 +0000

Sunnudaginn 6. maí, sem er fjórði sunnudagur eftir páska, verður messa kl. 11 í Hjallakirkju. Í messunni verður ein stúlka, Katrín Ásta Bergmann, fermd. Ritningarlestra dagsins má sjá hér.

Sunnudagaskólinn í Hjallakirkju er kominn í sumarfrí en kirkjurnar í Kópavogi munu í samstarfi halda sunnudagaskóla í allt sumar og verður hann staðsettur í Lindakirkju og hefst kl. 11 hvern sunnudag í sumar.

Guðsþjónusta og vorhátíð sunnudagskólans

Sr. Íris Kristjánsdóttir — Tue, 24 Apr 2012 19:04:34 +0000

Héraðspresturinn okkar í Reykjavíkurprófastsdæmi eystra, Dr. Sigurjón Árni Eyjólfsson, mun prédika í guðsþjónustu næsta sunnudags kl. 11, þann 29. apríl. Sr. Íris Kristjánsdóttir þjónar og kórfélagar sjá um að leiða sálmasönginn. Organisti er Jón Ólafur Sigurðsson.

Lexía dagsins er úr 43. kafla Jesaja og þar segir: „Svo segir Drottinn sem lagði veg yfir hafið og braut yfir hin ströngu vötn, hann sem leiddi út vagna og hesta ásamt öflugum her en þeir liggja kyrrir og rísa ekki aftur, þeir kulnuðu út eins og hörkveikur. Minnist hvorki hins liðna né hugleiðið það sem var. Nú hef ég nýtt fyrir stafni, nú þegar vottar fyrir því, sjáið þér það ekki? Ég geri veg um eyðimörkina og fljót í auðninni.” Aðra ritningartexta þessa sunnudags má sjá hér.

Sunnudagaskólinn, sá síðasti þennan veturinn, verður svo kl. 13. Þá ætlum við að hafa það enn skemmtilegra en vanalega, grilla pylsur og fara í leiki. Ef veður leyfir þá verðum við utandyra, annars í neðri safnaðarsal. Allir eru hjartanlega velkomnir.

Lofgjörð með Þorvaldi

Sr. Sigfús Kristjánsson — Tue, 17 Apr 2012 15:31:24 +0000

22. apríl kemur Þorvaldur Halldórsson í heimsókn í Hjallakirkju og leiðir lofgjörðarstund ásamt sr. Sigfúsi. Þorvaldur leiðir sönginn á sinn einstaka hátt.

Sunnudagaskólinn verður á sínum stað kl. 13.

Tónlistarmessa 15. apríl

Sr. Íris Kristjánsdóttir — Tue, 10 Apr 2012 14:19:40 +0000

Tónlistarmessa verður sunnudaginn 15. apríl kl. 11. Sr. Íris Kristjánsdóttir þjónar og félagar úr kór kirkjunnar leiða safnaðarsöng. Valdemar Gísli Valdemarsson leikur einleik á gítar. Hann mun leika í góða stund áður en messan hefst. Organisti er Jón Ólafur Sigurðsson.

Sunnudagaskóli er á sínum stað kl. 13.

Verkin sem Vademar Gísli leikur í messunni eru eftirfarandi:

Fyrir messu leikur hann þrjú verk eftir Fernando Carulli: Andante; Poco Allegretto og Ballet.

Sem forspil: Hríslan og lækurinn eftir Inga T. Lárusson

Milli lestra: Melancholy Galliard eða Fortune eftir John Dowland

Eftir prédikun: 3 stuttar etýður eftir Leo Brouwer

Í messulok: Sons de Carrilhoes eftir Joao Pernambuco